《讀好書，唔好成日玩》
以前成日聽老豆老母講，乖乖地讀書，唔好成日玩，今日聽到有個中學生反駁，細個係需要玩，依家唔玩等時邊有得玩。年紀輕輕可以講得出呢句話，我都幾欣賞，因為佢明白將來面對社會係點，但亦因為自己唔後生，所以開始有另一種體會。
當你步入社會，你會面對現實，你既能力、知識、人脈、智慧等等都會影響你一生。
父母咁講，唔係一句囉嗦咁簡單，而係佢地前半世人嘅遺憾。
佢地面對過太多挫折同難過，審視過自己之後，發現原來讀書好緊要，年少時積累好緊要，因為你性格會成為習慣，而習慣會影響你一生。
佢地試過工作停滯不前，陷入一個死胡同走唔出嚟；
佢地試過家底唔好無好學歷，錯過好多機會；
佢地試過捱足半世都只係兩手空空；
佢地試過人地有關係輕輕鬆鬆得到更多；
佢地試過回望過去，恨錯難返。
老豆成日講，佢讀到小學，做野先再讀夜校學英文，佢可以做到今時今日養大我地都算好好；我見佢真係好努力，佢亦心知，除咗起跑線外，仲有天花板，而呢個天花好耐之前已經定左，你要再撐起，需要花更多力氣去做。
佢地話讀好書，一句好簡單，但背後原因同心路歷程佢又點講晒比你知？
今日聽到中學生回應，已經步入中年既我都想講兩句。
Work Hard, Play Hard，讀好書，盡力玩，小朋友才做選擇，大個你會明咩叫why not both。
依家你可以覺得父母囉嗦，但當你諗通時後悔時，父母都仲會安慰你。
當你開始明白父母諗乜時，你就老了。
Search